புளி உணவு மட்டுமின்றி மருந்தாகவும் பயன்படுகிறது என்று நம்மில் எத்தனை நபர்களுக்குத் தெரியும்? சமைக்கும்போது காய்கறியை புளியில் சிறிது நேரம் வேகவைத்து சமைக்க வேண்டும். பாத்திரத்தை கீழே இறக்கும் போது தான் மல்லித்தழையும், , பெருங்காயத்தையும் போட வேண்டும், அப்போது தான் குழம்பு மணக்கும் என்று நம் வீடுகளில் பாட்டி சத்தமிடுவதை நாம கேட்டிருப்போம். சமீப காலமாக புளியில் ஊறாத காய், ஏலக்காய் இல்லாத லட்டு, பட்டை போடாத பிரியாணி, மல்லித்தழை இல்லாத ரசம், கறிவேப்பிலை இல்லாமல் தாளிக்கப்படும் சட்னி என நம் சமையல் மாறிக்கொண்டே வருகிறது. ஏனென்று கேட்டால் எப்படியும் சாப்பிடும்போது அனைத்தையும் தூக்கிப்போடத் தான் போகிறோம் என்று கூறுவர்.
மேலும் ஸ்பைஸியா சாப்பிடக் கூடாது என இவையெல்லாம் நாங்கள் சேர்த்துக்கொள்வது இல்லை என சாதரணமாக கூறுவர். ஸ்பைஸினா காரமா சாப்பிடுவது என தெரியும் ஆனால் இந்த புளி எப்படி ஸ்பைஸி உணவுப் பட்டியலில் சேர்ந்தது? புளியின் மருத்துவ குணங்கள் பற்றி தெரிந்தால் இனி அப்படி செய்யமாட்டீர்கள். அதைப் பற்றித்தான் நாம் இங்கே தெரிந்துகொள்ள போகிறோம்.
குழந்தைகளுக்கு புளிக்குழம்பு பிடிக்காது என்று கூறுவர். அதற்கு காரணம் அதன் சுவை குறைவாகவும், குழம்பின் நிறம் கருப்பாக இருப்பது தான் என்று கூறுவர். கருப்பு என்றாலே அழுக்கு பழுப்பு நிறம் என்று அவர்கள் நினைக்க காரணம் அவர்கள் ஆழ்மனதில் நாம் விதைத்த சில தவறான சிந்தனைகள் தான். ஆனால் இந்த புளி மருத்துவ குணம் கொண்டது என ஆப்பிரிக்க அப்பத்தாக்களுக்கு தெரிந்துள்ளது. அதனால் தான் காய்ச்சல், அஜீரணம், சுவாச நோய்கள் காயத்தால் வந்த புண்களை சரி செய்ய புளியைப் பயன்படுத்துகின்றனர். இதனை Journal of Ethnopharmacology (ஜர்னல் ஆஃப் எத்னோபார்மகாலஜி) என்ற புத்தகம் மிகவும் எளிமையாக நமக்கு கூறுகிறது.
சமைக்கும் போது காய்கறிகளை புளிக்கரைசலில் ஊறவைத்துப் பின் வேக வைப்பதால் அதன் புரதச்சத்தும், கனிமச்சத்தும் பாதுகாக்கப்படுகிறது என தேசிய உணவியல் கழகம் கூறுகிறது. நம் தமிழர்களின் உணவு பழக்க வழக்கம் மருத்துவ குணம் நிறைந்தது என்பதற்கு கிடைத்த ஒரு அங்கீகாரம் என்றே இதனை கூறலாம். இந்தப் புளிக்கரைசலில் ஆன்டி-ஆக்ஸிடன்ட் அதிகம் உள்ள டார்டாரிக் அமிலம், வைட்டமின் B வகைச் சத்துக்கள், கால்சியம், மருத்துவக் குணமுள்ள Phytonutrients போன்றவை அதிகளவில் உள்ளது. இரத்தக்கொழுப்பிற்கும் உடலில் அதிகளவு சர்க்கரை சேர்வதற்கும் இந்த புளிக்கரைசல் ஒரு நல்ல மருந்தாக செயல்படுகிறது. உலகம் முழுவதும் கொண்டாடும் ஐரோப்பாவின் Worcestershire sauce (வோர்செஸ்டெர்ஷைர் சாஸ்), ஜமைக்காவின் Pickapeppa sauce (பிக்காபெப்பா சாஸ்) ஆகிய இரண்டிலும் நாம் குறைவாக நினைக்கும் புளிக்கரைசல் தான் மிக முக்கியமான மருத்துவ குணம் நிறைந்த உணவுப்பொருளாக சேர்க்கப்படுகிறது.