சேப்பங்கிழங்கில் உள்ள ஊட்டச்சத்துக்கள்
சேப்பங்கிழங்கில் விட்டமின்கள் இ மற்றும் பி6 அதிகளவும், விட்டமின் ஏ,சி, கே, பி1,பி2,பி3,பி5(பான்டோதெனிக் அமிலம்), பி9 (ஃபோலேட்டுகள்) ஆகியவையும் உள்ளன.
இதில் தாது உப்புக்களான கால்சியம், செம்புச்சத்து, இரும்புச்சத்து, மெக்னீசியம், மாங்கனீசு, செலீனியம், துத்தநாகம், பொட்டாசியம் போன்றவை காணப்படுகின்றன.
இக்கிழங்கில் அதிகளவு கார்போஹைட்ரேட்டும், நார்ச்சத்தும் உள்ளன. மேலும் இதில் புரதச்சத்து காணப்படுகிறது. பீட்டா கரோடீன், கிரிப்டோசாந்தைன் போன்ற பைட்டோ-நியூட்ரியன்கள் இதில் உள்ளன.
சேப்பங்கிழங்கு – மருத்துவப் பண்புகள்
செரிமானம் நன்கு நடைபெற
சேப்பங்கிழங்கில் நார்ச்சத்துடன் கூடிய கார்போஹைட்ரேட் உள்ளது. நார்ச்சத்தானது சிறுகுடலால் செரிக்கப்படுவதில்லை. பெருங்குடலில் உள்ள நல்ல பாக்டீரியாக்களுக்கு நார்ச்சத்து உணவாவதுடன் அவற்றின் வளர்ச்சியை ஊக்குவிக்கிறது.
மேலும் நார்ச்சத்துடன் கூடிய கார்போஹைட்ரேட் சீரான உடல்வளர்ச்சிதை மாற்றம், இரத்தத்தில் சர்க்கரையின் அளவு, செரிமானம், இதயநலம் ஆகியவற்றை மேம்படுத்துகிறது.
மேலும் நார்ச்சத்தானது கழிவுகளை சேகரமாக்கி வெளியேற்றவும் உதவுகிறது. இதனால் மலச்சிக்கல், வயிற்றுப்போக்கு, அதிகப்படியான வாயு போன்றவைகள் ஏற்பாடமல் நார்ச்சத்தானது நம்மைப் பாதுகாக்கிறது.
இதயநலத்தை மேம்படுத்த
சேப்பங்கிழங்கில் உள்ள பொட்டாசியம் சவ்வு திரவப்பரிமாற்றம் நடைபெற உதவுகிறது. மேலும் பொட்டாசியமானது இரத்தநாளங்களில் ஏற்படும் அழுத்தத்தை குறைக்கிறது.
இதனால் இரத்த அழுத்தம் சீராகிறது. சீரான இரத்த அழுத்தத்தால் இதய நலம் மேம்படுகிறது.
பார்வை நலத்திற்கு
கண்தசை அழற்சி நோய்க்கு காரணமான ப்ரீரேடிக்கல்களின் செயல்பாடுகளைத் தடுத்து கண்ணினைப் பாதுகாக்கின்றன.
சருமப் பாதுகாப்பிற்கு
சேப்பங்கிழங்கில் உள்ள விட்டமின் ஏ மற்றும் இ சருமத்தினைப் பாதுகாக்க உதவுகிறது. இவ்விட்டமின்கள் காயங்களை விரைந்து ஆற்றுவதோடு சருமத்தில் சுருக்கங்கள் ஏற்படாமல் பாதுகாக்கின்றன. இவ்விட்டமின்கள் சருமத்திற்கு பளபளப்பை தருகின்றன.
நோய் எதிர்ப்பாற்றலை வழங்குதல்
சேப்பங்கிழங்கில் உள்ள விட்டமின் சி உடலின் நோய் எதிர்ப்பாற்றலை அதிகரிக்கச் செய்கின்றன.
இவை இரத்த வெள்ளை அணுக்களின் உற்பத்தியை அதிகரித்து உடலுக்குள் நோய்க்கிருமிகள் செல்வதைத் தடைசெய்கின்றன.
கேசப் பராமரிப்பிற்கு
சேப்பங்கிழங்கில் உள்ள விட்டமின் இ-யானது சுற்றுசூழல் மாற்றத்தால் முடி உதிர்வதைத் தடுக்கிறது. மேலும் இது முடிக்குத் தேவையான இரத்த ஓட்டத்தை அதிகரித்து முடியை இளமையாகவும், ஆரோக்கியமாகவும் இருக்கச் செய்கிறது.
விட்டமின் இ-யானது இயற்கை ஈரப்பதத்தை கேசத்திற்கு வழங்கி முடி வறண்டு போகாமல் பாதுகாக்கிறது.
இரத்த ஓட்டத்தை அதிகரிக்க
சேப்பங்கிழங்கில் உள்ள இரும்பு சத்துகள் இரத்த சிவப்பணுக்களின் உற்பத்தியை அதிகரித்து இரத்த ஓட்டத்தை அதிகரிக்கிறது.
இரத்த ஓட்டம் நன்றாக இருந்தால் தான் உடலின் வளர்ச்சிதை மாற்றம், புதிய செல்களின் வளர்ச்சி ஆகியவை மேம்படும். இரத்த சோகை நோய் வராமல் இக்கிழங்கு தடுக்கிறது.
எலும்புகளைப் பாதுகாக்க
சேப்பங்கிழங்கில் உள்ள செம்புச்சத்து, துத்தநாகம், கால்சியம், மாங்கனீசு உள்ளிட்டவைகள் எலும்புகள் தேய்மானம் அடைவதையும், ஆஸ்டியோபோரோஸிஸ் எனப்படும் எலும்புத் தேய்மானம் நோய் ஏற்படுவதையும் தடுக்கிறது.
இதில் காணப்படும் செம்புச்சத்து ஆரோக்கியமான எலும்புகள் மற்றும் இணைப்பு திசுக்களின் வளர்ச்சிக்கு உதவுகின்றது.
நினைவாற்றலை அதிகரிக்க
சேப்பங்கிழங்கில் உள்ள விட்டமின் பி1 கவனம், ஆற்றல் ஆகியவற்றை அதிகரித்து, நாள்பட்ட மனஅழுத்தம், மறதி ஆகியவற்றைத் தடைசெய்கிறது.
கற்றல் மற்றும் நினைவாற்றல் ஆகியவற்றை விட்டமின் பி1 அதிகரிப்பதாக ஆய்வுகள் கூறுகின்றன. எனவே இக்கிழங்கினை உண்டு நினைவாற்றலை அதிகரிக்கலாம்.
சேப்பங்கிழங்கினைப் பற்றிய எச்சரிக்கை
சேப்பங்கிழங்கினை பச்சையாக உண்ணக் கூடாது. சேப்பங்கிழங்கினை அவித்து உண்ண வேண்டும். இதில் கார்போஹைட்ரேட் மற்றும் கலோரிகள் அதிகமாக இருப்பதால் இதனை அளவாக உண்ண வேண்டும்.
சேப்பங்கிழங்கினை வாங்கும் முறை
சேப்பங்கிழங்கினை வாங்கும்போது புதிதான, கனமானதாக உள்ளவற்றை பார்த்து வாங்க வேண்டும்.
மேற்புறத்தில் வெட்டுக்காயங்கள், கீறல்கள், தொட்டால் மென்மையாக உள்ளவை மற்றும் முளைத்தல் உள்ளவற்றை வாங்குவதைத் தவிர்த்தல் நல்லது.
சேப்பங்கிழங்கினை குளிர்சாதனப் பெட்டியில் வைக்கக் கூடாது. சேப்பங்கிழங்கானது அவித்து பயன்படுத்தப்படுகிறது. கேக்குகள், சிப்ஸ்கள், ஐஸ்கிரீம்கள், இனிப்புகள், சூப்புகள் போன்றவை தயாரிக்கவும் இது பயன்படுத்தப்படுகிறது.
கீதா