மோரின் மகாத்மியம்

வெயில் காலம் வந்து விட்டாலே போதும், மோர் குடிக்கும் பழக்கம் நம்மிடையே அதிகரித்து விடுகிறது. கோவில் பண்டிகை காலங்களில் தெருவெங்கும் ‘நீர்மோர்‘ ஸ்டில்களை காணலாம். அன்னதானம் போல், மோர் ‘தானமும்‘ புண்ணிய செயலாக கருதப்படுகிறது. காரணம் மோரின் சிறந்த மருத்துவ குணங்கள், பழங்காலத்திலிருந்தே நமக்கு தெரிந்த எளிமையான பானம். எதற்கெடுத்தாலும் காஃபி, டீ என்று அலைகிற இந்த காலத்தில் கூட மோருக்கென்று தனி முக்கியத்துவம் இருக்கிறது. மோரின் மகாத்மியம் ஆயுர்வேத ஆசான்களான ஆத்திரேயர், அக்னி வேசர் காலத்திலிருந்தே தெரிந்திருந்தது.

லாக்டோ பாசிலஸ் (Lactobacillus), என்னும் பாக்டீரியா பாலை தயிராக மாற்றும் ரசாயன செயல்பாட்டை செய்கிறது. இந்த பாக்டீரியாவுடன் ஈஸ்டும் சேர்ந்து உதவுகிறது. பால் தயிராக மாற்ற உதவுகிறது. பாலில் உள்ள லாக்டோஸ் என்ற சர்க்கரை லாக்டிக் அமிலாமாக மாற்றப்படுகிறது. இதனால் பாலில் உள்ள முக்கிய புரதமான காசின் (Casein), படிந்து தயிராகிறது. இந்த ரசாயன மாற்றுதலால் ஏற்படும் லாக்டிக் அமிலம் சீஸ், தயிர் போன்றவற்றின் சுவைக்கு காரணம்.

இந்த நட்பு பாக்டீரியாக்கள் வைட்டமின்களையும், தாதுப்பொருட்களையும் உடல் எளிதில் ஜீரணிக்க உதவுகிறது. எனவே இவை உடல் ஆரோக்கியத்திற்கு இன்றியமையாதவை. சில சமயங்களில் நாம் உட்கொள்ளும் ஆன்டி பயாடிக்  மருந்துகள்  கெட்ட பாக்டீரியாவுடன் சேர்த்து இந்த நல்ல பாக்டீரியாக்களையும் கொன்றுவிடுகின்றன. இந்த மாதிரி சமயங்களில் மோர் குடித்தால் இழந்த நட்பு பாக்டீரியாக்களை மீட்க உதவுகிறது.

கொழுப்பு நீக்கப்பட்ட பால் / தயிர் இவற்றிலிருந்து மோர் தயாரிக்கப்படுவதால் அதில் கொழுப்பு குறைவு. மோரில் பொட்டாசியம், விட்டமின் பி12 மற்றும் கால்சியம் நிறைந்திருக்கிறது. ஆடை அகற்றிய பாலை விட மோரில் லாக்டிக் அமிலம் அதிகம். பாலை விட மோர் சுலபமாக ஜீரணமாகும். ஒரு கப் முழுமையான பாலில் 157 கலோரிகளும், 8.9 கிராம் கொழுப்பும் இருக்கின்றன. அதே அளவு மோரில் 99 கலோரிகளும் 2.2 கிராம் கொழுப்பும் தான் இருக்கிறது.

மோரின் உபயோகங்கள்

மோர் இலகுவான, குளிர்ச்சியான புத்துணர்ச்சி ஊட்டும் பானம். தாகத்தை அடக்கும். மோருடன் இஞ்சி, ஜீரகம், பெருங்காயம், சர்க்கரை, உப்பு, கருமிளகு போன்ற பலவற்றை சேர்க்கலாம். இதனால் ஜீரண சக்தி அதிகரிக்கும்.

மூல நோய்க்கு முக்கியமான வீட்டு மருந்து மோர் தான். தினமும் கருமிளகு பொடியும் உப்பும் சேர்த்த மோரை, 100 மி.லி. அளவில் இரண்டு மூன்று மாதங்கள் குடித்து வந்தால் மூல வியாதி குணமாகும். ஆயுர்வேதம் மூல வியாதி உள்ளவர்களை தினமும் மோர் குடிக்குமாறு வலியுறுத்திகிறது.

சிலருக்கு ஆசன வாயில் நமைச்சலும் அரிப்பும் ஏற்படும் இதற்கும் மோர் அருமருந்து ஆகும். சில நாட்கள் மோரும், எலுமிச்சம் பழச்சாறும், காரமில்லா உணவும் உண்டு வந்தால் இந்த எரிச்சலும் அரிப்பும் அடங்கும்.

பேதி, சோகை மற்றும் உடல் எடை குறைவு பாதிப்புகளை போக்க மோருடன் அத்திமர இலைகள் சுக்கு சேர்த்துக் குடித்து வர வேண்டும்.

குழந்தைகளுக்கு உணவுக்கு 1 மணி நேரம் முன்பு மோருடன் சர்க்கரை சேர்த்துக் கொடுக்க பேதி, வாந்தி இவை ஏற்படாது.

சர்க்கரை சேர்ந்த மோரை குடித்து வந்தால் சிறுநீர் பாதையில் ஏற்படும் தொற்றுவியாதிகள் குறையும்.

மஞ்சள் காமாலை நோயின் போது குழைந்த சாதத்துடன் மோர் கலந்து சாப்பிட நல்ல குணம் தெரியும்.

குழந்தைகளின் வயிற்றுப் பூச்சிகளை நீக்க மோருடன் வாயுவிளங்கம் மூலிகை பொடி கலந்து கொடுக்கலாம்.

மில்க் ஷேக்ஸ்

வாழைப்பழ மில்க் ஷேக்

தேவையான பொருட்கள்

வாழைப்பழம் –1

யோகர்ட்     –1/2கப்

பால்         –1/2கப்

ஜாம்         –1டே.ஸ்பூன்

சீனி          -தேவைக்கேற்ப

ஐஸ்க்யூப்ஸ்  -சிறிது

செய்முறை

பாலைக்காய்ச்சி ஆற வைத்துக் கொள்ளவும். வாழைப்பழங்களை சிறு சிறு துண்டுகளாக நறுக்கிக் கொள்ளவும். வாழைப்பழத்தை ஒரு மிக்ஸியில் போட்டு அதனுடன் ஜாம், யோகர்ட், பால், சீனி, ஐஸ் க்யூப்ஸ் முதலியவற்றைச் சேர்த்து ஒரு அடி அடித்து சில்லென்று பருகவும்.

கோகனெட் மில்க் ஷேக் 

தேவையான பொருட்கள்

தேங்காய்ப்பால்  –1 கப்

வாழைப்பழம்    –1

சீனி             -தேவைக்கேற்ப

துருவியதேங்காய்-சிறிது

ஐஸ்க்யூப்ஸ்     -சிறிது

செய்முறை

வாழைப்பழத்தை துண்டுகளாக நறுக்கிக் கொள்ளவும். அதனுடன் தேங்காய்ப்பால், சீனி, ஐஸ் க்யூப்ஸ் சேர்த்து ஒரு அடி அடித்து தேங்காய் பூ தூவி ஜில்லென்று பருகவும்.

சோயா கொக்கோ மில்க் ஷேக்

தேவையான பொருட்கள்

சோயாமில்க்     –1கப்

கொக்கோபவுடர்  –2டீஸ்பூன்

பால்             –1கப்

சீனி              -தேவைக்கேற்ப

ஐஸ்க்யூப்ஸ்      -சிறிது

செய்முறை

பாலைக் காய்ச்சி ஆற வைக்கவும். சோயா மில்க், கொக்கோ பவுடர், சீனி, பால், ஐஸ் க்யூப்ஸ் முதலியவற்றை ஒரு மிக்ஸியில் போட்டு ஒரு அடி அடித்துப் பருகவும்.

பீட்ரூட் மில்க் ஷேக்

தேவையான பொருட்கள்

பீட்ரூட்           –1

பால்              –1/2லிட்டர்

வெனிலாஐஸ்கிரீம் –1கப்

சீனி                -தேவைக்கேற்ப

வெனிலாஎசன்ஸ்    –1/2டீஸ்பூன்

ஜெல்லி             –1கப்

தண்ணீர்             –1டம்ளர்

செய்முறை

பாலைக் காய்ச்சி ஆற வைத்துக் கொள்ளவும். பீட்ரூட் தோலை சீவி நறுக்கி மிக்ஸியில் போட்டு 1 டம்ளர் தண்ணீர் விட்டு அரைத்து வடிகட்டிக் கொள்ளவும். ஆறிய பாலுடன், பீட்ரூட் ஜுஸ், சீனி, வெனிலா எசன்ஸ் சேர்த்து மிக்ஸியில் ஒரு அடி அடித்து அதனை ஒரு கண்ணாடி டம்ளரில் ஊற்றி அதன் மேல் ஐஸ்கிரீம், ஜெல்லி சேர்த்து அலங்கரித்துப் பருகவும்.

சோயா கீர்

தேவையான பொருட்கள்

சோயாசங்க்ஸ் –100கிராம்

பால்           –1/2லிட்டர்

சீனி            –200கிராம்

முந்திரி         –10

கிஸ்மிஸ்       –10

நெய்            –2டீஸ்பூன்

வெனிலாஎசன்ஸ்-சிறிது

செய்முறை

முதலில் சோயா சங்க்ஸை கொதிக்கும் வெந்நீரில் போட்டு 10 முதல் 20 நிமிடம் வரை விடவும். பின் கொதி நீரை வடித்து விட்டு குளிர்ந்த நீரில் நன்கு கழுவி, தண்ணீர் இல்லாமல் பிழிந்து எடுத்துக் கொள்ள வேண்டும். அதனை மிக்ஸியில் போட்டு கரகரப்பாக அரைக்கவும். பின் ஒரு வாணலியில் நெய் விட்டு முந்திரி, கிஸ்மிஸை வறுத்து எடுத்துக் கொண்டு அந்த நெய்யிலேயே அரைத்த சோயாவை போட்டு நன்கு வதக்கவும்.

வேறொரு பாத்திரத்தில் பாலை ஊற்றிக் காய்ச்சவும். பால் கொதிக்கும் பொழுது நெய்யில் வதக்கிய சோயாவை போட்டு வேக விடவும். நன்கு வெந்தவுடன் சீனியைப் போட்டு அது கரைந்தவுடன், நெய்யில் வறுத்த முந்திரி, கிஸ்மிஸ்ஸைப் போட்டு இறக்கவும். சிறிது ஆறியதும் வெனிலா எசன்ஸ் சேர்த்து சூடாகவோ அல்லது ஃப்ரிட்ஜில் வைத்து ஜில்லென்றோ பரிமாறவும்.

சாக்லேட் மில்க் ஷேக்

தேவையான பொருட்கள்

பால்           –1டம்ளர்

கொக்கோபவுடர்-1டீஸ்பூன்

சீனி           -தேவைக்கேற்ப

ஐஸ்க்யூப்ஸ்   -சிறிது

செய்முறை

பாலைக் காய்ச்சி ஆற வைத்துக் கொள்ளவும். ஒரு ப்ளண்டரில் பால், கொக்கோ பவுடர், சீனி, ஐஸ் க்யூப்ஸ் சேர்த்து நுரை வரும் வரை அடித்துப் பருகவும்.

நுங்கு மில்க் ஷேக்

தேவையான பொருட்கள்

இள நுங்கு    –4

பால்         –2கப்

சீனி          -தேவைக்கேற்ப

ரோஸ்எசன்ஸ்-சிறிது

ஐஸ்க்யூப்ஸ்  -சிறிது

செய்முறை

நுங்கின் மேல் தோலை உரித்து எடுத்து விட வேண்டும். பாலைக் காய்ச்சி ஆற வைத்துக் கொள்ளவும். ஒரு மிக்ஸியில் நுங்கு, பால், சீனி, ரோஸ் எசன்ஸ், ஐஸ் க்யூப்ஸ் சேர்த்து அரைத்து ஒரு கண்ணாடி டம்ளரில் ஊற்றி மேலே சிறிது நுங்கை மிதக்க விட்டு பரிமாறவும்.

மேங்கோ ஸ்மூத்தி

தேவையான பொருட்கள்

மாம்பழம்  –1

பால்       –1கப்

சீனி        -தேவைக்கேற்ப

வெனிலாஐஸ்கிரீம்-1கப்

ஐஸ்க்யூப்ஸ்      -சிறிது

வெனிலாஎசன்ஸ்  -சிலதுளி

செய்முறை

பாலைக் காய்ச்சி ஆற வைத்துக் கொள்ளவும். மாம்பழத்தை தோல் சீவி நறுக்கி வைத்துக் கொள்ளவும். ஒரு மிக்ஸியில் மாம்பழம், பால், சீனி, எசன்ஸ், ஐஸ் க்யூப்ஸ் முதலியவற்றைப் போட்டு அடித்து ஒரு கண்ணாடி டம்ளரில் ஊற்றி மேலே ஐஸ்கிரீமை வைத்து அதன் மேல் மாம்பழத்துண்டுகளை போட்டுப் பரிமாறவும்.

ஆப்பிள் மில்க் ஷேக்

தேவையான பொருட்கள்

ஆப்பிள்         –1

பால்            –1கப்

எலுமிச்சம்ஜுஸ் –1ஸ்பூன்

ஜாதிக்காய்ப்பொடி-1சிட்டிகை

ஐஸ்க்யூப்ஸ்     -சிறிது

செய்முறை

பாலைக் காய்ச்சி ஆற வைத்துக் கொள்ளவும். ஆப்பிளை தோல் சீவி நறுக்கிக் கொள்ளவும். ஒரு மிக்ஸியில் பால், ஆப்பிள், சீனி, ஜாதிக்காய்ப் பொடி, ஐஸ் க்யூப் முதலியவற்றைப் போட்டு ஒரு அடி அடித்து கடைசியாக எலுமிச்சம் ஜுஸ் கலந்து பருகவும்.

பாதாம் கீர்

தேவையான பொருட்கள்

பாதாம்பருப்பு –15

பால்         –2கப்

சீனி          -தேவைக்கேற்ப

குங்குமப்பூ    –1சிட்டிகை

சாரைப்பருப்பு  –2டீஸ்பூன்

செய்முறை

பாதாம் பருப்பை சிறிது வெந்நீரில் ஊற வைத்து தோலை உரித்து விட்டு அரைத்துக் கொள்ளவும். பாலைக் காய்ச்சி ஆற வைத்துக் கொள்ளவும். பால், பாதாம்பருப்பு, சீனி முதலியவற்றை மிக்ஸியில் போட்டு ஒரு அடி அடித்துக் கொள்ளவும். பின்னர் அதனை நன்கு கொதிக்க விடவும். குங்குமப் பூவை சூடான பாலில் ஊற வைத்து கொதிக்கும் பாதாம் கீரில் ஊற்றவும். சாரைப்பருப்பைச் சேர்த்து ஆறியதும் ஃப்ரிட்ஜில் வைத்து குளிரச் செய்து ஜில்லென்று பரிமாறவும்.

லஸ்ஸி

தேவையான பொருட்கள்

தயிர்         –2கப்

சீனி          -தேவைக்கேற்ப

ரோஸ்எசன்ஸ்-1/4டீஸ்பூன்

ஐஸ்க்யூப்ஸ்  -சிறிது

செய்முறை

ஒரு மிக்ஸியில், தயிர், சீனி, ரோஸ் எசன்ஸ், ஐஸ்கட்டிகள் சேர்த்து ஒரு அடி அடித்து கண்ணாடி டம்ளரில் ஊற்றிப் பருகவும்.

வெள்ளரிக்காய் ஸ்வீட் லஸ்ஸி

தேவையான பொருட்கள்

வெள்ளரிக்காய்-1

தயிர்         –1கப்

சீனி          -தேவைக்கேற்ப

புதினாஇலை  -சிறிது

ஐஸ்க்யூப்ஸ்  -சிறிது

செய்முறை

வெள்ளரிக்காயின் தோலை சீவி சிறு சிறு துண்டுகளாக நறுக்கவும். ஒரு மிக்ஸியில் வெள்ளரிக்காய், தயிர், சீனி, ஐஸ் க்யூப்ஸ் சேர்த்து அரைத்து ஒரு கண்ணாடி டம்ளரில் ஊற்றி மேலே புதினா இலை தூவி பரிமாறவும்.

வெள்ளரிக்காய் மசாலா லஸ்ஸி

தேவையான பொருட்கள்

தயிர்        –2கப்

வெள்ளரி     –1

புதினாஇலை  –1/2கப்

பச்சைமிளகாய்-1

சீரகம்         –1/4டீஸ்பூன்

உப்பு           -தேவைக்கேற்ப

ஐஸ்க்யூப்ஸ்    -சிறிது

செய்முறை

வெள்ளரிக்காயை தோல் சீவி நறுக்கிக் கொள்ளவும். வெள்ளரிக்காய், புதினா இலை, பச்சை மிளகாய், சீரகம், உப்பு முதலியவற்றை ஒரு மிக்ஸியில் போட்டு நைசாக அரைத்துக் கொள்ளவும். பின்பு அதனுடன் தயிர், ஐஸ் க்யூப்ஸ் சேர்த்து ஒரு அடி அடித்து கண்ணாடி டம்ளரில் ஊற்றி, டம்ளரின் விளிம்பில் ஒரு வெள்ளரிக்காய் ஸ்லைஸை சொருகிப் பரிமாறவும்.

மசாலா வெஜிடபிள் லஸ்ஸி

தேவையான பொருட்கள்

புளிப்பில்லாததயிர்-2கப்

கேரட்            –1டே.ஸ்பூன்

மாங்காய்         –1டீஸ்பூன்

பச்சை மிளகாய்  –1/2

வெள்ளரிக்காய்   –1டே.ஸ்பூன்

இஞ்சி            –1/2இன்ச்

உப்பு             -தேவைக்கேற்ப

சீனி              –1டீஸ்பூன்

வறுத்துப்பொடித்தசீரகப்பொடி-1/2டீஸ்பூன்

கடுகு             -சிறிது

எண்ணெய்        – சிறிது

கொத்தமல்லி      -சிறிது

செய்முறை

கேரட், மாங்காய், வெள்ளரிக்காய் முதலியவற்றை துருவி மேற்சொன்ன அளவு எடுத்துக் கொள்ளவும். பச்சைமிளகாய், இஞ்சியை அரைத்துக் கொள்ளவும். ஒரு ப்ளண்டரில் தயிர், உப்பு, சீனி, அரைத்த விழுதைச் சேர்த்து ஒரு அடி அடிக்கவும். பின்னர் அதில் துருவிய வெஜிடபிள்களைச் சேர்த்து கலக்கி, வறுத்துப் பொடித்த சீரகத்தூள் 1/2 டீஸ்பூன் சேர்க்கவும். எண்ணெய்யில் கடுகை தாளித்துக் கொட்டவும். ஒரு கண்ணாடி டம்ளரில் ஐஸ் கட்டிகளைப் போட்டு மசாலா வெஜிடபிள் லஸ்ஸியை ஊற்றி கொத்தமல்லி தூவி பரிமாறவும்.

பீட்ரூட் லஸ்ஸி

தேவையான பொருட்கள்

தயிர்            –1கப்

பீட்ரூட்சிறியது   –1

சீனி             -தேவைக்கேற்ப

ஜாதிக்காய்ப்பொடி-1சிட்டிகை

ஐஸ்க்யூப்ஸ்     -சிறிது

செய்முறை

பீட்ரூட்டை தோல் சீவி துருவி வேக வைத்துக் கொள்ளவும். சிறிது பீட்ரூட் துருவலை அலங்கரிக்க வைத்துக் கொள்ளவும். ஒரு ப்ளண்டரில் தயிர், வேக வைத்த பீட்ரூட் துருவல், சீனி, ஜாதிக்காய்ப் பொடி, ஐஸ் க்யூப்ஸ் முதலியவற்றைப் போட்டு ஒரு அடி அடித்து மேலே பீட்ரூட் துருவலை தூவி பரிமாறவும்.

ட்ரை ஃப்ரூட்ஸ் லஸ்ஸி

தேவையான பொருட்கள்

தயிர்     –2கப்

பாதாம்   –5

முந்திரி   –5

பிஸ்தா    –5

கிஸ்மிஸ்  –10

குங்குமப்பூ -சிறிது

பேரீட்சை  –3

சீனி        -தேவைக்கேற்ப

ஏலக்காய்ப்பொடி-1சிட்டிகை

ஐஸ்க்யூப்ஸ்  -சிறிது

செய்முறை

பாதாம், முந்திரி, பிஸ்தா, கிஸ்மிஸ், பேரீட்சை முதலியவற்றை தண்ணீரில் ஊற வைத்து நைசாக அரைத்துக் கொள்ளவும். ஒரு ப்ளண்டரில் தயிர், அரைத்த விழுது, சீனி, ஏலக்காய்ப் பொடி, ஐஸ்கட்டி போட்டு ஒரு அடி அடித்து கண்ணாடி டம்ளரில் ஊற்றி மேலே குங்குமப் பூவைப் போட்டு பரிமாறவும்.

நீர் மோர்

தேவையான பொருட்கள்

கெட்டித்தயிர்     –1கப்

பச்சைமிளகாய்   –1

இஞ்சி            -சிறிது

மாங்காய்         -சிறு துண்டு

கொத்தமல்லி     -சிறிது

கறிவேப்பிலை    -சிறிது

சீரகம்             -சிறிது

பெருங்காயம்      -சிறிது

உப்பு              -தேவைக்கேற்ப

செய்முறை

பச்சைமிளகாய், இஞ்சி, மாங்காய், சீரகம், பெருங்காயம் முதலியவற்றை நைசாக அரைத்துக் கொள்ளவும். தயிரில் ஒரு லிட்டர் தண்ணீர் ஊற்றி தேவையான அளவு உப்புப் போட்டு கடைந்து கொள்ளவும். அதனுடன் அரைத்த விழுதையும் சேர்த்துக் கலந்து, கொத்தமல்லி, கறிவேப்பிலையை பொடியாக நறுக்கி தூவி ஃப்ரிட்ஜில் வைத்து குளிரச் செய்து பரிமாறவும்.

மேங்கோ லஸ்ஸி

தேவையான பொருட்கள்

மாம்பழம் –1

தயிர்     –2கப்

தேன்     –1டே.ஸ்பூன்

உப்பு      –1சிட்டிகை

சீனி       -தேவைக்கேற்ப

ஐஸ் க்யூப்ஸ்-சிறிது

செய்முறை

மாம்பழத்தை தோலை சீவி, கொட்டையை எடுத்து விட்டு துண்டுகளாக நறுக்கிக் கொள்ளவும். ஒரு ப்ளண்டரில் தயிர், மாம்பழம், தேன், உப்பு, சீனி, ஐஸ்க்யூப்ஸ் சேர்த்து ஒரு அடி அடித்து ஜில்லென்று பரிமாறவும்.